Plantun de Prouvènço

Pèr coumpara dos planto d'encò nostre

Ceratocephala falcata & Asparagus acutifolius

Tas

Ceratocephala falcata

Ranunculaceae

Noms en français : Cératocéphale en faux, Renoncule en faux.

Descripcioun :
Curiouso planto, curious noum aquéu tas que trachis, souvènt en group, dins li meissoun e ermas d'Auto Prouvènço. Lou tas èi pas bèn grand (10 cm), d'un verd clar, emé de noumbróusi fueio en rouseto di proun descoupado en ventau. Li flour soun d'un jaune clar e fan de gròssis espigo (fin qu'à 4 cm) que sèmblon espinouso emé sis akène en formo de daio (falcatus). Flouris d'ouro, tre la debuto de mars.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 2 à 12 cm
Fueio : basalo
Tipe bioulougico : Teroufite
Cicle bioulougico : Planto de l'an

Gènre : Ceratocephala
Famiho : Ranunculaceae

Ordre : Ranunculales

Coulour de la flour : Jauno
Petalo : >6
Ø (o loungour) flour : 2 à 6 mm
Flourido : Printems Ivèr

Sòu : Ca
Autour basso e auto : 0 à 1300 m
Aparado : Noun
Remarco : Arquéofito
Mars à mai

Liò : Meissoun - Ermas - Champ
Estànci : Mesoumediterran à Mountagnard
Couroulougi : Éurasiatico
Ref. sc. : Ceratocephala falcata (L.) Pers., 1805 (= Ranunculus falcatus L., 1753 )

Espargo-fèro

Asparagus acutifolius

Asparagaceae

Àutri noum : Aspàrgou, Espargasso, Roumanin-couniéu, Roumiéu-couniéu, Pèd-de-Róumi.

Nom en français : Asperge sauvage.

Descripcioun :
L'espargo-fèro es uno planto bèn couneigudo de nòsti garrigo e éusiero. A la fin de l'ivèr sort de terro, èi lou moumen de l'acampa ! Pièi la tijo devèn duro coume uno co-rudo. Flouris tardié, raramen avans juliet.

Usanço :
Coume l'avèn di, s'acampo à la primo pèr li meleto. La planto èi proun bono pèr la santa, richo en vitamino (A, B, C, PP...) e en sau mineralo (P, Mn...). Fai pissa (óudour de 1,2-ditiole) e es un pau lachativo.